Səhiyyə Nazirliyi WUF13 ilə bağlı tibbi təminat işlərini açıqlayıb.
Nazirlik tərəfindən WUF13-ün tibbi təminatını həyata keçirəcək tibb müəssisələrinə yerində baxış keçirilib. Bunlara Bakı Sağlamlıq Mərkəzi, Milli Oftalmologiya Mərkəzi, Mərkəzi Klinika, Liv Bona Dea, International Medical Centre və Məlhəm Hospital daxildir.
Tibb müəssisələrinin şəraiti, maddi-texniki bazası və heyətin hazırlığı qiymətləndirilib, koordinatorlar təyin edilib.
Tədbirə Yeni Klinika, Kliniki Tibbi Mərkəz, Mərkəzi Neftçilər Xəstəxanası, Məhəmmədi Modul Tipli Xəstəxana və Respublika Təcili Tibbi Yardım Mərkəzi də cəlb olunub.
Tədbir məkanında işin təşkili üçün Səhiyyə Nazirliyinin əməkdaşları ayrılıb, zəruri tibbi avadanlıq və dərman vasitələri təmin edilib.
Tədbir zamanı tibb məntəqələrində həkim və orta tibb işçiləri xidmət göstərəcək. Sanitariya-gigiyena tədbirləri çərçivəsində qonaqların toplaşdığı yerlərdə mütəmadi dezinfeksiya aparılacaq, iaşə obyektlərində monitorinqlər keçiriləcək.
WUF13 mayın 17-22-də Bakıda keçiriləcək və dayanıqlı şəhər inkişafına həsr olunub.
