İyunun 13-də Xankəndi, Xocalı və Ağdərə məktəblərində 2025-2026-cı tədris ilinin başa çatması münasibətilə "Son zəng" tədbirləri keçirilib.
Bərpa, Tikinti və İdarəetmə Xidmətinin məlumatına görə, bu il Xankəndi şəhər 4 nömrəli məktəbdən 32, Xocalının Ballıca kənd məktəbindən 15, Xocalı şəhər 1 nömrəli məktəbindən 6 şagird məzun olub.
Ağdərə rayonunda Vəngli məktəbindən 3, Həsənriz məktəbindən isə 4 şagird məzun adını qazanıb.
Tədbirdə çıxış edənlər məzunları təbrik edərək, onların Qarabağ torpağında "Son zəng" sevincini yaşamalarını tarixi hadisə adlandırıblar.
Vurğulanıb ki, işğaldan azad olunmuş ərazilərdə müasir təhsil infrastrukturu yaradılıb, yeni məktəb binaları tikilib, mövcud məktəblər əsaslı təmir olunub. Dövlət şagirdlərin keyfiyyətli təhsil alması üçün hər cür şərait yaradıb.
Tədbirin sonunda Dövlət Himni səsləndirilib, kompozisiyalar nümayiş olunub və son zəng çalınaraq tədris ilinə yekun vurulub.
