Xankəndidə illik 25 milyon cüt iş əlcəyi istehsal gücünə malik müəssisə fəaliyyətə başlayıb. Məhsullar sənaye və təsərrüfat sahələrində istifadə olunacaq.
Oxu.Az xəbər verir ki, istehsalat müəssisəsində yerli sakinlər işlə təmin edilib. Onlardan biri Xankəndi sakini Xəyalə Babayevadır. O, "GP Safety" MMC-nin əlcək istehsalı müəssisəsində çalışır.
Xəyalə Babayeva: "Bir ildir Xankəndiyə köçmüşük. Köçdən sonra iş təklif etdilər, mən və yoldaşım əlcək sexində işləməyi seçdik. Artıq daimi işləyirik."
Müəssisədə dörd növ əlcək istehsal olunacaq. Məhsullar daxili bazar üçün nəzərdə tutulub. İlkin mərhələdə 35 nəfər işlə təmin olunacaq, əsasən keçmiş məcburi köçkünlər.
Elxan Babayev: "Xankəndiyə dönəndən sonra işlə təminatın zaman alacağını düşünürdüm, amma əksini yaşadıq. Həyat yoldaşımla birgə işlə təmin edildik. Doğma yurdumuzun quruculuğunda iştirak qürurludur."
Müəssisənin investisiya həcmi 3.5 milyon manatdır. Dövlət dəstəyi ilə İqtisadiyyat Nazirliyinin Azərbaycan Biznesinin İnkişafı Fondu 1 milyon manat güzəştli kredit ayırıb, idxal olunan texnika üçün 238 min manat ƏDV-dən azadolma tətbiq edilib.
Bu müəssisə yerli əhalinin işlə təmin olunmasına, daxili bazarın tələbatının ödənilməsinə və ixracyönümlü istehsalın artırılmasına xidmət edir. Gələcəkdə məhsulların Avropa bazarına ixracı planlaşdırılır.
