Qafqaz Müsəlmanları İdarəsi (QMİ) Xankəndidə iki qanunsuz tikilinin sökülməsi ilə bağlı yayılan iddialara aydınlıq gətirib. Eçmiədzin kilsəsinin aprelin 23-də yaydığı bəyanatı 'düşmənçilik və dezinformasiya' adlandıran QMİ, bu addımı normallaşma prosesinə zərbə kimi qiymətləndirib.
QMİ-nin açıqlamasında bildirilir ki, işğal illərində Azərbaycanın tarixi, dini və mədəni abidələrinin dağıdılmasına səssiz qalan Eçmiədzin, indi əsassız ittihamlarla çıxış edərək məsələni siyasiləşdirməyə çalışır. Qeyd edilib ki, sökülən tikililər işğal dövründə qanunsuz inşa edilib və Azərbaycan dövləti suverenliyini bərpa etdikdən sonra onları saxlayıb. Lakin keçmiş məcburi köçkünlərin təkrar müraciətləri əsasında bu tikililərin sökülməsi qərara alınıb.
Bəyanatda vurğulanır: 'Beynəlxalq humanitar hüquqa görə, işğalçı dövlət tərəfindən razılıq olmadan inşa edilən tikililər qanunsuzdur və sökülməlidir. Həm hüquqi, həm də mənəvi baxımdan bu addım tam əsaslıdır'.
QMİ həmçinin Azərbaycanın dini tolerantlıq ənənələrini xatırladıb: 'Ölkəmiz məscid, kilsə və sinaqoqların yan-yana olduğu nadir məkanlardandır. İşğal dövründə dağıdılan dini abidələr dövlət hesabına bərpa olunur. Şuşadakı Qazançı kilsəsinin bərpası və Bakı erməni kilsəsinin qorunması bunun bariz nümunəsidir'.
İdarə bu cür təxribatların dayandırılmasını tələb edərək, regionda sülhün qarşısını almağa yönəlmiş cəhdlərə son qoyulmasını istəyib.
