Xətai rayonunda aramsız yağışlardan sonra evlərin altında torpaq çökməsi baş verib. Həyətyanı sahələrdə böyük çuxurlar yaranıb, hətta bir evin mətbəxi kollektora düşüb.
Hadisə Tofiq Hacıbabayev küçəsi, 88 ünvanında qeydə alınıb. Sakinlərin sözlərinə görə, yağışlar gücləndikdən sonra küçəboyu evlərin həyətlərində çökmələr başlayıb. Son günlərdə isə dərin quyular meydana çıxıb.
Sakinlər evlərin kollektor üzərində tikilmədiyini, çökməyə səbəbin sonradan çəkilmiş kollektor olduğunu iddia edir. Onlar aidiyyəti qurumlara müraciət ediblər.
İri Şəhərlərin Birləşmiş Su Təchizatı Xidmətindən bildirilib ki, kollektor üzərində tikililər şəbəkədə qəzaya səbəb olub. Qurum vurğulayıb ki, mühafizə zolaqlarında tikinti işləri qanunsuzdur. Bakı Sukanal İdarəsi əraziyə baxış keçirib.
