Fövqəladə Hallar Nazirliyinin (FHN) Dövlət Yanğın Nəzarəti Xidməti, Bakının Xətai rayonunda fəaliyyət göstərən bir ərzaq mağazasında keçirdiyi yoxlamada ciddi nöqsanlar aşkar edib. Aşkar edilən pozuntular səbəbindən mağazanın fəaliyyəti dayandırılıb.
FHN-dən verilən məlumata görə, yoxlama zamanı obyektdə avtomatik yanğın xəbərdarlıq sisteminin tam quraşdırılmadığı, mövcud sistemin isə nasaz olduğu müəyyən edilib. Elektrik avadanlıqlarının quraşdırılması qaydalara uyğun aparılmayıb, naqillərin birləşmələri xüsusi sıxaclarla bərkidilməyib.
Bundan başqa, izolyasiyası zədələnmiş elektrik avadanlıqlarından istifadə olunur, naqillər yanar materialların üzərindən çəkilib, ilkin yanğınsöndürmə vasitələri tam təmin edilməyib, köçürmə yolları materiallarla bağlanıb, təxliyə planı hazırlanmayıb, taxta konstruksiyalar yanğına qarşı işlənməyib, ərazi təmizlənməyib və “Çıxış” işarələri quraşdırılmayıb. Həmçinin, obyektin icbari sığortası da yoxdur.
FHN qeyd edir ki, belə şəraitdə mağazada yanğın baş verərsə, qısa müddətdə böyük faciəyə səbəb ola bilər. Bu səbəbdən mağazanın fəaliyyəti barədə qərar qəbul edilib və qərar nümayəndəyə təqdim olunub.
Yanğın təhlükəsizliyi ilə bağlı daha ətraflı məlumat üçün yanğın təhlükəsizliyi səhifəmizi ziyarət edin.
