Xırdalan şəhəri, Həsən Əliyev küçəsində yol örtüyü bərbad vəziyyətdədir. Bu, sürücülərə çətin anlar yaşadır.
Yağışlı havalarda vəziyyət daha da pisləşir. Havalar normal olsa da, yol daim su içindədir. Sürücülər yoldan keçməkdə böyük çətinlik çəkirlər.
Bir sakin deyir: 'Qoxudan ərazidə dayanmaq mümkün deyil. Yollar avtomobillərimizə ciddi ziyan vurur. Dərdimizi kimə deyəcəyimizi bilmirik.'
Digər bir vətəndaş əlavə edir: 'Vəziyyət çox bərbaddır. Hər gün eyni mənzərə. Tıxacın sonu görünmür, problemlə maraqlanan yoxdur. Artıq bezmişik.'
Abşeron Rayon İcra Hakimiyyətinin nümayəndəliyindən bildirilib ki, küçədə ilin əvvəlində təmir işləri aparılıb. Lakin son yağışlar qrunt sularını aktivləşdirib, yol qatı yuyulub və çalalar əmələ gəlib. Aidiyyəti quruma məlumat verilib, yaxın günlərdə işlər başlayacaq.
Qeyd olunub ki, Həsən Əliyev küçəsi Pirşağı-Novxanı-Xırdalan-M4 yol layihəsinə daxildir. Buna görə əsaslı təmir məqsədəuyğun deyil. Yeni yol 2026-2027-ci illərdə istifadəyə veriləcək. Lakin yaxın günlərdə cari təmir işləri aparılacaq.
