Xırdalan şəhərində Həsən Əliyev küçəsində yol aylardır acınacaqlı vəziyyətdədir. Sürücülər narazılıqlarını bildirir.
Yağışlı havalarda ərazidə su toplanır, iri çala-çuxurlar görünməz olur. Minik avtomobilləri və avtobuslar həmin çuxurlara düşüb. Alternativ yol olmadığı üçün sürücülər məcburən bu yoldan istifadə edir.
Xırdalan şəhər inzibati ərazi dairəsi üzrə nümayəndəlik bildirib ki, bu ilin əvvəlində cari təmir işləri aparılıb, lakin intensiv yağışlar səbəbindən qrunt suları aktiv şəkildə toplanıb, yol qatı yuyulub. Nümayəndəlik aidiyyəti quruma məlumat verib və yaxın günlərdə təmir işlərinə başlanılacaq.
Bundan əlavə, Prezidentin sərəncamına əsasən, Pirşağı-Novxanı-Xırdalan-M4 avtomobil yolunun tikintisi davam edir. Bu layihəyə Həsən Əliyev küçəsi də daxildir. Yeni yolun 6 hərəkət zolağı olacaq, uzunluğu 28 km, eni 22.5 m olacaq. Layihə 2026-2027-ci illərdə tamamlanacaq. Lakin həmin vaxta qədər küçədə yenidən cari təmir işləri aparılacaq.
