Yaş artdıqca sümüklərin bərpa qabiliyyəti zəifləyir. Uşaqlarda sümük toxuması daha aktiv olur, qan dövranı güclü, hüceyrə yenilənməsi sürətlidir. Buna görə sınıqlar daha tez sağalır.
Bu fikirləri Səhiyyə Nazirliyinin rəsmi "Instagram" hesabında canlı yayım zamanı Travmatologiya və Ortopediya İnstitutunun baş direktor müavini Nizami Məmmədov bildirib.
Yetkin yaşlarda, xüsusilə 40-50 yaşdan sonra sümük toxumasının bərpa prosesi yavaşlayır. Uşaq və böyüklərin travmaları arasındakı əsas fərq uşaqların sümüklərinin daha elastik olmasıdır. Onlarda tam sınıqlardan çox, natamam sınıqlar və ya sümüyün əyilməsi müşahidə edilir.
Baş həkim qeyd edib ki, uşaqlarda sümüklərin uclarında yerləşən "böyümə qığırdaqları" zədələnərsə, gələcəkdə sümüyün qısa qalması, əyrilik və inkişaf pozğunluğu yarana bilər. 40-50 yaşdan sonra qadınlarda menopauza dövründə sümük sıxlığı azalır, osteoporoz riski artır.
Uşaqların orqanizmi toxumaları daha sürətli yeniləyir, əzələ və bağları daha tez uyğunlaşdırır. Lakin düzgün qidalanma, kalsium və D vitamini qəbulu, siqaretdən uzaq durmaq, fiziki aktivlik və həkim nəzarəti sümük sağalmasını yaxşılaşdıra bilər.
