Vətəndaş sosial şəbəkələrdə paytaxtın Yasamal rayonu ərazisində yerləşən parklanma məntəqəsindən şikayət edib.
Onun sözlərinə görə, avtomobilini park etmək istəsə də, parklanma xidmətini aktivləşdirə bilmədiyi üçün cərimələnib. Buna səbəb isə xidmətin aktivləşdirilməsi üçün tələb olunan kodun görünməməsidir.
Şikayət edilən ərazi Şəfayət Mehdiyev küçəsində yerləşir. Problemin əsas səbəbi həmin ərazidə tikinti aparan şirkətin parklanma nişanının yerləşdiyi hissəni hasara almasıdır. Nəticədə, nişan və üzərindəki kod hasarın arxasında qaldığından sürücülər məlumatı görə bilmir, parklanma xidmətini aktivləşdirə bilmədikləri üçün isə cərimə olunurlar.
Məsələ ilə bağlı tikinti işlərini həyata keçirən şirkətin nümayəndəsi Ülvi Rəsulov Baku TV-yə bildirib: "Azərbaycan Yerüstü Nəqliyyat Agentliyinin '141' çağrı mərkəzi ilə dəfələrlə əlaqə saxlamışam. Bəlkə də, 10-15 dəfə müraciət etmişik ki, gəlib bu problemi aradan qaldırsınlar. Hətta təklif etmişəm ki, bizə icazə versinlər, parklanma nişanını söküb yol tərəfə yerləşdirək ki, insanlar rahat görə bilsinlər. Dəfələrlə müraciət etməyimizə baxmayaraq, heç kim tədbir görmür".
