Prezident İlham Əliyev məktəbəqədər təhsildə yeni maliyyələşmə modelinin tətbiqi ilə bağlı fərman imzalayıb. Fərmana əsasən, dövlət, valideyn və özəl sektorun birgə iştirakına əsaslanan yeni mexanizm tətbiq ediləcək.
ABŞ təhsil eksperti Qoşqar Məhərrəmov modeli şərh edib. O bildirib ki, bu, beynəlxalq təcrübədə "PPP" (Dövlət-Özəl Tərəfdaşlıq) kimi tanınır. Azərbaycanda valideynlərin də cəlb olunması müsbət addımdır.
Modeldə uşağın təhsil xərclərinin bir hissəsini valideyn, digər hissəsini dövlət qarşılayır. Özəl müəssisə xidmət göstərir, ödəniş isə birgə həyata keçirilir.
Ekspert qeyd edib ki, bu model Türkiyədə də tətbiq olunur. Dövlət hər şagird üçün vəsait ayırır, həmin vəsait özəl məktəbə gedən uşağa yönəldilə bilər.
Modelin uğuru tətbiq mexanizmlərindən asılıdır. Maliyyə şəffaflığı və ciddi nəzarət vacibdir. Effektiv audit sistemi olmadan risklər yarana bilər.
Q.Məhərrəmov fərmanı yeni mərhələnin başlanğıcı adlandırıb. Model bağçalara çıxışı genişləndirə, özəl sektorun marağını artıra bilər.
