Yeni Yasamal yaşayış massivinin sakinləri yaşadıqları binanın yaxınlığından keçən magistral su kəmərlərinin səs-küy və vibrasiyasından narazıdırlar.
Oxu.Az-a daxil olan şikayətdə bildirilir ki, 16 mərtəbəli binanın cəmi on metrliyindən iki magistral su kəməri keçir. “Kəmərlərdən gələn güclü səs və vibrasiya gündəlik həyatımızı çətinləşdirib. Gecələr səs daha da güclü hiss olunur, normal istirahət etmək mümkün deyil”, - deyə şikayətdə qeyd olunur.
İri Şəhərlərin Birləşmiş Su Təchizatı Xidməti bildirib ki, həmin ərazidə Bakı Sukanal İdarəsinin istismarında olan 500 mm və 800 mm diametrli Xarici Dairəvi magistral su kəmərləri üzərində havaburaxıcı qurğular quraşdırılıb. Bu qurğular kəmərlərin ən yüksək nöqtələrində yerləşir və gündə iki dəfə 15-20 dəqiqə işə salınır. Onların götürülməsi su təchizatında fasilələrə səbəb ola bilər.
