Zaqatala rayonunun Mamrux kənd sakini Məhəmməd Davudov 30 ildir icarə əsasında istifadə etdiyi torpaq sahəsinin əlindən alınmaq üzrə olduğunu bildirib.
Şikayətçi deyir ki, torpaq sahəsi 1997-ci ildə torpaq islahatı zamanı ona ayrılıb. İlkin 93 sot olan sahə 2000-ci illərin əvvəlində sənədləşmə yenilənərkən 60 sota endirilib.
2020-ci ildə 4 hektarlıq bələdiyyə torpağının ayrılması səbəbindən sərhədlər dəyişdirilib. 2024-cü ilin dekabrında bələdiyyə müqavilənin müddətinin bitdiyini bildirib.
M.Davudov: "Fevralda sənədləri yeniləmək istədikdə mühasib torpağın başqa şəxsə icarəyə veriləcəyini söylədi. Narazılığım varsa, hərraca qatılmağı məsləhət gördülər".
Bələdiyyə sədri T.İbrahimov isə bildirib ki, torpaq hələ heç kimə verilməyib və növbəti ay hərraca çıxarılacaq.
