Kəlbəcər rayonunun Zar kəndi işğaldan azad olunan ərazilərdə yenidən qurulan müasir yaşayış məntəqələrindən biridir. Dəniz səviyyəsindən 2400 metr yüksəklikdə yerləşən bu qədim kənd, zəngin təbiəti və strateji mövqeyi ilə seçilir. Kəndin təməli 2023-cü il avqustun 25-də Prezident İlham Əliyev və birinci xanım Mehriban Əliyeva tərəfindən qoyulub.
Kəlbəcər Rayonunda Bərpa, Tikinti və İdarəetmə Xidmətinin Mətbuat xidməti şöbəsinin müdiri Nuranə Babayeva bildirib ki, Zar kəndi sosial-iqtisadi və strateji əhəmiyyət daşıyan yaşayış məntəqəsi kimi layihələndirilib. Ümumilikdə 855 ailənin məskunlaşması nəzərdə tutulan kənd üçün 243 hektardan çox ərazi ayrılıb və layihə 20 illik inkişaf perspektivi nəzərə alınmaqla hazırlanıb. Birinci mərhələdə 547 ailənin köçürülməsi planlaşdırılır.
Yeni kənddə müasir sosial infrastruktur yaradılır: 528 şagird yerlik məktəb, 100 yerlik uşaq bağçası, müasir küçə və işıqlandırma sistemi, geniş yaşıllaşdırma və abadlıq işləri nəzərdə tutulur. Əhalinin məşğulluğu və dayanıqlı yaşayış mühiti prioritetdir. Evlərin və küçələrin işıqlandırılmasında "yaşıl enerji" imkanlarından istifadə olunacaq. Zar kəndi Kəlbəcər şəhər mərkəzindən təxminən 26 km məsafədə yerləşir.
