Ötən ilin ən böyük əməliyyatlarından olan 5 milyon manatlıq siqaret qaçaqmalçılığı ilə bağlı ilkin istintaq başa çatıb.
Oxu.Az xəbər verir ki, təqsirləndirilən şəxslərə yekun ittiham elan edilib.
Bakı-Hövsan Beynəlxalq Ticarət Dəniz Limanının sahibi Ruslan Eyyubov, liman rəisi Rəşad Daşdəmirov, Dəniz Nəqliyyatı və Enerji Resursları Baş Gömrük İdarəsinin Liman Məntəqəsinin rəisi Fərid Usubov və digərləri barəsində istintaq sənədləri müdafiə tərəfinə təqdim olunub.
Tanışolma prosesindən sonra materiallar Bakı Ağır Cinayətlər Məhkəməsinə göndəriləcək.
Təqsirləndirilənlər Cinayət Məcəlləsinin 206.4, 213-1.2.1, 213-1.2.2, 213-1.2.3 və 308.2-ci maddələri ilə ittiham olunurlar.
Qeyd edək ki, iş Baş Prokuror yanında Korrupsiyaya qarşı Mübarizə Baş İdarəsində istintaq olunub. Təqsirləndirilən şəxslər ötən ilin dekabrından həbsdədirlər.
