Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan vətəndaşları barələrində apelyasiya məhkəməsi başlayır.
Oxu.AZ AZƏRTAC-a istinadən xəbər verir ki, işə Bakı Apellyasiya Məhkəməsində hakim Elmar Rəhimovun sədrliyi ilə baxılacaq. Məhkəmə prosesi bu gün başlayır.
Xatırladaq ki, Bakı Hərbi Məhkəməsinin qərarına əsasən, Arutyunyan Arayik, Mnatsakanyan Levon, Manukyan David, İşxanyan Davit və Babayan David ömürlük azadlıqdan məhrumetmə cəzasına məhkum edilib. Qukasyan Arkadi və Saakyan Bako 20 il, Babayan Madat və Paşayan Melikset 19 il, Martirosyan Qarik 18 il, Allahverdiyan Davit və Balayan Levon 16 il, Beqlaryan Vasili, Stepanyan Qurgen və Qazaryan Erik 15 il müddətinə azadlıqdan məhrum ediliblər.
