Şəki Ağır Cinayətlər Məhkəməsində Həsrət Əliyevin işi üzrə hökm çıxarılıb. O, xüsusi amansızlıqla qəsdən adam öldürməkdə və qanunsuz silah saxlamaqda təqsirli bilinib.
Məhkəmə prosesində H.Əliyev ifadə verib: "Hadisədən sonra özümə də xəsarət yetirdim, intihara cəhd etdim". O, arvadı Zəhranın xəyanət etdiyindən şübhələndiyini və qısqanclıq zəminində cinayəti törətdiyini bildirib.
İstintaq materiallarına görə, Həsrət Əliyev 2025-ci ildə qanunsuz olaraq ov bıçağı əldə edib. May ayının sonlarında o, Şəkidə arvadını bıçaqlayaraq öldürüb. Hadisə zamanı azyaşlı oğlu da evdə olub.
Məhkəmə kollegiyası onu Cinayət Məcəlləsinin 120.2.4, 120.2.9 və 228.5-ci maddələri ilə təqsirli bilərək 18 il müddətinə azadlıqdan məhrum edib. Cəzasını ciddi rejimli cəzaçəkmə müəssisəsində çəkəcək.
