Deputat Fazil Mustafaya sui-qəsd cəhdində təqsirləndirilən Emin Əliyarov barəsindəki kassasiya şikayətinə baxılıb.
APA-nın məlumatına görə, Ali Məhkəmədə hakim Nazim Mövsümovun sədrliyi ilə keçirilən iclasda qərar qəbul olunub. Qərara əsasən, kassasiya şikayəti təmin edilməyib və əvvəlki hökm qüvvədə saxlanılıb.
Xatırladaq ki, sui-qəsd hadisəsi 2023-cü il martın 28-də Sabunçu rayonunun Zabrat qəsəbəsində baş verib. Milli Məclisin deputatı Fazil Mustafaya evinin qarşısında Kalaşnikov avtomatından atəş açılıb.
Dövlət Təhlükəsizliyi Xidməti tərəfindən Cinayət Məcəlləsinin 277, 228.2.1 və digər maddələri ilə iş başlanıb. Əməliyyat nəticəsində şübhəlilər tutulub: Emin Əliyarov, Rəşad Əhmədov, Azər Səricanov, Elşad Əsgərov, Səbuhi Şirinov.
Bakı Ağır Cinayətlər Məhkəməsinin hökmü ilə Azər Səricanov ömürlük, Səbuhi Şirinov 20 il, Rəşad Əhmədov 19 il, Elşad Əsgərov 18 il, Emin Əliyarov isə 4 il müddətinə azadlıqdan məhrum edilib. Apellyasiya məhkəməsi bu hökmü təsdiqləyib.
