Bakıda gözəllik salonunda tanışını öldürməyə cəhddə təqsirləndirilən Samir Həsənovun məhkəməsi davam edir.
Bakı Ağır Cinayətlər Məhkəməsində hakim Səbinə Məmmədzadənin sədrliyi ilə keçirilən iclasda şahidlər dinlənilib.
Şahid Tünzalə Əliyeva ifadəsində təqsirləndiriləni tanımadığını, hadisə yerində qan gördüyünü deyib: "Otağa girəndə qan var idi. Köməyə çağırdım".
O, əlavə edib ki, Samir zərərçəkmişə subay kimi tanış olub, lakin evli olduğu üzə çıxandan sonra münasibətlər pisləşib: "Samir WhatsApp-da yazmışdı ki, ayrılsa öldürəcək".
Şahid bildirib ki, zərərçəkmiş ondan 3000 manat borc alıb, lakin qaytarmayıb: "Pulu Samirin işlərini ağırlaşdırmaq üçün istədiyini dedi. 7 aydır ödənişləri mən edirəm".
Digər şahid Ömər Muradov deyib: "Samir içəri girib dərhal Cahanın üstünə şığıdı. Mən arxadan yumruq və təpik vurdum, amma təsir etmədi".
Sübutların tədqiqi zamanı məlum olub ki, təqsirləndirilən polisə könüllü təslim olmayıb. Vəkilin vəsatəti ilə polis şöbəsinə sorğu göndərilib və təmin edilib.
Növbəti iclas iyunun 4-nə təyin edilib.
Qeyd edək ki, hadisə 2025-ci ilin noyabrında Nizami rayonundakı gözəllik salonunda baş verib. Samir Həsənov 30 yaşlı Cahan Çələbiyevaya kəsici alətlə xəsarət yetirib. Qadın xəstəxanaya yerləşdirilib. S.Həsənov qəsdən adam öldürməyə cəhd maddəsi ilə ittiham olunur.
