Abşeron Rayon Polis İdarəsinin əməkdaşları tərəfindən keçirilən əməliyyat zamanı 19 kiloqram narkotik və psixotrop maddənin qanunsuz dövriyyəyə buraxılmasının qarşısı alınıb.
Daxili İşlər Nazirliyinin Mətbuat Xidmətindən verilən məlumata görə, 47 yaşlı Emin Əhmədov adlı yük maşını sürücüsü saxlanılıb. Onun maşınından 8 kq heroin və 3 kq-dan çox metamfetamin aşkarlanıb.
Araşdırmalarla müəyyən edilib ki, E.Əhmədov narkotikləri İran vətəndaşından alaraq qaçaqmalçılıq yolu ilə Azərbaycana gətirib. Hazırda narkoşəbəkənin digər üzvlərinin müəyyənləşdirilməsi üçün tədbirlər davam etdirilir.
Polis əməkdaşları tərəfindən daha iki nəfər - 44 yaşlı Ramil Həsənov və 38 yaşlı İlham Cümşüdoğlu da saxlanılıb. Onlardan ümumilikdə 8 kq-a yaxın narkotik aşkarlanıb. Həmin şəxslər narkotikləri Bakı və Abşeronda satmaq məqsədilə əldə etdiklərini bildiriblər.
Faktlarla bağlı cinayət işi başlanılıb, araşdırmalar davam edir.
