Çoxsaylı vətəndaşları aldadaraq onların adına şirkətlər açmaqda ittiham olunan mütəşəkkil dəstə üzvləri ifşa edilib.
Baş Prokurorluğun apardığı araşdırmalar nəticəsində 10-a yaxın şəxs cinayət məsuliyyətinə cəlb olunub.
Təqsirləndirilənlər arasında "SHARM DİZAYN" MMC rəhbəri Elton Səlimov, "KANARYA.LLD" MMC rəhbəri Çələbi Məmmədov, "ZINAV-LTD" MMC rəhbəri Rövşən Hüseynov və digərləri var.
Onlar müxtəlif vətəndaşları aldadaraq adlarına VÖEN və şirkətlər rəsmiləşdirib, daha sonra bu hüquqi şəxslər vasitəsilə maliyyə əməliyyatları aparıblar.
Zərərçəkənlərdən biri adına açılmış şirkətin 55 min manat vergi borcunu öyrənib. Digər bir şəxs xaricə səfərdə məhdudiyyətlə qarşılaşaraq 40 min manat vergi borcu olduğunu bilib.
İstintaq zamanı məlum olub ki, sonuncu şəxsin adına rəsmiləşdirilən şirkətlər üzrə ümumilikdə 1 milyon manatdan çox dövriyyə qeydə alınıb. İşbazlar bu qanunsuz əməllərlə milyonlarla pul qazanıblar.
Baş Prokurorluqda aparılan geniş araşdırmadan sonra Çələbi Məmmədov, Rövşən Hüseynov da daxil olmaqla bəzi dəstə üzvləri həbs edilib.
Dövlət Vergi Xidməti işdə zərərçəkmiş kimi tanınıb.
Təqsirləndirilən şəxslərə Cinayət Məcəlləsinin 178.4-cü (xüsusilə külli miqdarda dələduzluq) və 193-1.3.2-ci (cinayət yolu ilə əldə edilmiş əmlakın leqallaşdırılması) maddələri ilə ittiham verilib. Bu əməllərin cəzası 10 ildən artıq həbsdir.
Cinayət işləri üzrə ibtidai istintaq başa çatıb. Yaxında məhkəmə araşdırmasına başlanacaq.
