Hərbi Hava Qüvvələrinin sabiq komandan müavini mərhum polkovnik Mayis Orucəliyevin cinayət əməli üzə çıxıb.
O, xüsusilə külli miqdarda mənimsəmədə ittiham olunur. Cinayət işi Hərbi Prokurorluqda araşdırılıb. Dövlətə dəymiş ziyan 1 milyon manata yaxındır.
Təqsirləndirilən şəxsin həyat yoldaşı hüquqi varis qismində tanınıb. Orucəliyev öldüyü üçün təqsir sübuta yetirilsə də, iş bəraətverici əsaslar olmadan xitam veriləcək. Ziyan mərhumun əmlakı hesabına ödənilə bilər.
Cinayət Məcəlləsinin 179.4-cü (xüsusilə külli miqdarda mənimsəmə) və 341.2.3-cü (vəzifə səlahiyyətlərini aşma) maddələri ağır korrupsiya cinayətləri sırasındadır.
Polkovnik Orucəliyev uzun müddət general-leytenant Ramiz Tahirovun müavini işləyib. 2022-ci ildə 57 yaşında xəstəlikdən vəfat edib.
Analoji hal müdafiə nazirinin sabiq müavini general-leytenant Fuad Məmmədovla bağlı da yaşanmışdı. O və iki şirkət əməkdaşı mənimsəmədə ittiham olunub. Məmmədov öldüyü üçün onu hüquqi varisi təmsil edib. Məhkəmə ölümündən 5 il sonra cinayət işinə bəraətverici əsaslar olmadan xitam verib. Mərhumun Badamdar qəsəbəsindəki torpaq sahəsi, Mərdəkandakı bağ evi, bahalı avtomobilləri və digər əmlakı dövlət nəfinə müsadirə olunub.
