Cəlilabadda qardaşının həyat yoldaşı Rəviyyə Nərmanovanı 74 bıçaq zərbəsi ilə qətlə yetirən Təhmasib Əliyev 18 il 6 ay müddətinə azadlıqdan məhrum edilib.
Lənkəran Ağır Cinayətlər Məhkəməsində keçirilən prosesdə ittiham aktı elan olunub. Təhmasib Əliyev qardaşının arvadı ilə mübahisədən sonra qisas məqsədilə onu öldürüb.
Hadisə gecə baş verib. Sərxoş vəziyyətdə olan Təhmasib, məişət bıçağını götürərək qadının yatdığı otağa pəncərədən daxil olub. Qadını yuxudan oyandıqdan sonra boğazından tutub 74 dəfə bıçaqlayıb.
Məhkəmədə təqsirləndirilən şəxs özünü təqsirli bildiyini deyib. O, ifadəsində qadının onu və mərhum atasını söydüyünü, buna görə əsəbiləşdiyini bildirib. Cinayətdən sonra peşman olduğunu deyərək 4 uşağının nəzərə alınmasını xahiş edib.
Mərhumun bacısı isə ifadəsində hadisədən bir gün əvvəl ailədə ev məsələsinə görə münaqişə olduğunu və Təhmasibin bacısını öldürməklə hədələdiyini söyləyib.
