Şabranda mənzilə basqın edərək ev sahiblərini öldürməkdə ittiham olunan Elçin Fərzəliyev və Murad Məmmədovun iki il davam edən məhkəmə araşdırması başa çatıb.
Sumqayıt Ağır Cinayətlər Məhkəməsində keçirilən sonuncu iclasda hökm oxunub. Məhkəmə kollegiyası hər iki təqsirləndirilən şəxsi tamah niyyəti ilə köməksiz vəziyyətdə olan şəxsi xüsusi amansızlıqla öldürməkdə və quldurluqda təqsirli hesab edib.
Elçinin bundan əvvəl də qəsdən adam öldürməyə görə 14 il həbsdə olması ağırlaşdırıcı hal kimi qeydə alınıb. Müttəhimlər özlərini qismən təqsirli bilib, evə səhv məlumat əsasında oğurluq məqsədilə girdiklərini deyiblər.
Cinayətin ağırlığı nəzərə alınaraq, Elçin Fərzəliyev və Murad Məmmədova heç bir güzəşt edilməyib. Onlar ömürlük azadlıqdan məhrum ediliblər.
Hadisə 2024-cü ildə baş verib. 43 yaşlı Elçin Fərzəliyev və 48 yaşlı Murad Məmmədov Şabran şəhərində yaşayış evinə basqın ediblər. Onlar dəmir predmetlə xəsarətlər yetirərək 54 yaşlı Gülnarə Hüseynovanı öldürüb, əri Arif Hüseynova xəsarət yetiriblər. Arif Hüseynov sonradan xəstəxanada dünyasını dəyişib.
