Rusiyada Moskvanın Presnensk rayon məhkəməsi Federal Korrupsiya ilə Mübarizə və Təhlükəsizlik Layihəsinin (FPBK) rəhbəri Vitali Borodinin müğənni Alla Puqaçovaya qarşı iddiasını tamamilə rədd etdi.
İddia şərəf, ləyaqət və işgüzar nüfuzun müdafiəsi ilə bağlı idi. Oxu.Az-ın məlumatına görə, bu barədə müğənninin hüquqşünasları meduza.io-ya bildiriblər.
Borodinə görə, Puqaçovanın 2025-ci ilin sentyabrında jurnalist Katerina Qordeyeva ilə YouTube müsahibəsinin 8 saniyəlik hissəsi onun şərəfini ləkələyir. Həmin hissədə Puqaçova deyir: "Borodin, hazır ol! 'Donos'çular və satqınlar, diqqətli olun!"
Borodin təkzib, 5 milyon rubl (təxminən 115,330 manat) kompensasiya və videonun silinməsini tələb etmişdi.
Puqaçovanın vəkili iddianın "şifahi replikanın təhrif olunmuş yazılı fiksasiyası" üzərində qurulduğunu bildirib. Vəkillər qeyd ediblər ki, "donosçular və satqınlar" sözləri birbaşa Borodinə yönəlməyib, yalnız "Borodin, hazır ol" ifadəsi onun adına deyilib. Bunu linqvist ekspertlər də təsdiqləyib.
Borodin məhkəmədə heç vaxt "donosçu" və ya "satqın" adlandırılmadığını söyləyib. Buna cavab olaraq hüquqşünaslar mediada onun bu cür adlandırıldığı 80 səhifəlik material təqdim ediblər.
Borodin Telegram kanalında qərardan apellyasiya şikayəti verəcəyini bildirib.
