Britaniyalı teatr və kino aktyoru Patrik Qodfri 94 yaşında vəfat edib.
"Markham Froggatt & Irwin" agentliyinin məlumatına görə, aktyor ötən gecə ailəsinin əhatəsində dünyasını dəyişib. Ölüm səbəbi açıqlanmayıb.
Patrik Qodfridən həyat yoldaşı, aktrisa Amanda Uoker, bir oğlu və bir qızı yadigar qalıb.
1933-cü ildə Londonda anadan olan aktyor 1970-1980-ci illərdə bir sıra məşhur Britaniya film və televiziya layihələrində rol alıb. O, xüsusilə "Qraf Monte-Kristo" və "Səfillər" ekran əsərlərindəki obrazları ilə tanınıb.
Dünya şöhrətini isə "Əbədi Sevginin Tarixi" filmində Leonardo da Vinçi obrazını canlandırdıqdan sonra qazanıb. Bundan əlavə, "Doktor Hu", "İnspektor Mors" və "Puaro" seriallarında da yaddaqalan rollar ifa edib.
