Məşhur "Friends" ulduzu Metyu Perrinin keçmiş köməkçisi Kennet İvamasa sübutların məhv edilməsi ilə bağlı ittiham olunub. Bu barədə TMZ məhkəmə sənədlərinə istinadən məlumat yayıb.
Nəşrin yazdığına görə, Perrinin ölümündən sonra İvamasa başqa bir şəxsə ketaminlə bağlı sübutları məhv etməyi, sənədlərdən qurtulmağı və rəqəmsal qeydləri silməyi tapşırıb.
Federal Təhqiqat Bürosu (FBI) bildirir ki, aktyorun keçmiş köməkçisi müstəntiqlərə dəfələrlə yalan danışıb. Əvvəlcə o, Perrinin ölüm günü ketamin qəbul etdiyini gizlədib, sonra isə aktyorun ampulları özü gizlətdiyini iddia edib. Lakin prokurorluq bu iddiaların yalan olduğunu deyir.
Bəyanatda qeyd edilir ki, İvamasa "B.M." adlı şəxsə Perrinin ölümündən sonra ketamin flakonlarını və şprisləri məhv etməyi tapşırıb. O, həmçinin həkim Salvador Plasensianın reseptinin məhv edilməsini əmr edib.
FBI-nin məlumatına görə, İvamasa daha sonra vasitəçi Erik Fleminqlə telefon danışığında törətdiklərini etiraf edib.
Xatırladaq ki, 54 yaşlı Metyu Perri 2023-cü il oktyabrın 28-də ketaminin normadan artıq qəbulu nəticəsində vəfat edib. Aktyorun ölümündən əvvəlki üç gündə ona təyin ediləndən əlavə 27 doza ketamin qəbul etdiyi məlum olub.
