Alla Puqaçovanın nəvəsi Nikita Presnyakova hədiyyə edilən dördmərtəbəli malikanənin real dəyəri 90-120 milyon rubl (1.7-2.2 milyon manat) arasında qiymətləndirilir.
Rieltor Yuliya Yusova "Abzats" nəşrinə bildirib ki, mülk İstra su anbarının sahilindəki Malıe Berejki kottec qəsəbəsində yerləşir. Puqaçova bu ərazini 1990-cı illərdə alıb.
Əsas binanın sahəsi 760 kvadratmetrdir. Evdə kinoteatr, bilyard otağı, hamam və hovuz var. Ərazidə işçilər üçün ev, qaraj və dayanacaq da mövcuddur. Obyektin bələdiyyədən icarəyə götürülmüş estakadası və sahil xətti də var.
Malikanə 2025-ci ilin sentyabrından satışdadır. İlkin qiymət 152 milyon rubl idi, sonra 130 milyona, daha sonra 125 milyona endirildi. 2026-cı il mayın 14-də qiymət 110 milyon rubl olsa da, alıcı tapılmayıb.
Yusova satışın uğursuzluğunu elit mənzil bazarındakı dəyişikliklərlə izah edir. Alıcılar artıq statusdan daha çox likvidlik, texniki vəziyyət, hüquqi şəffaflıq və saxlanma xərclərinə önəm verir.
Estakada ilə bağlı "Rosprirodnadzor" qanunpozuntuları aşkarlayıb: obyekt qeydiyyatda deyil, icazəsi yoxdur və su hövzəsi hərraclarına mane olur. Ekspert qeyd edir ki, bu tip nəhəng malikanələrə tələbat azalıb, çünki onların saxlanması bahalı investisiya tələb edir.
