Krasnodar diyarının Apellyasiya Məhkəməsi mərhum müğənni Yuri Şatunovun həyat yoldaşı Svetlananın şikayətini təmin edib. Şikayət Soçinin Xostinski Rayon Məhkəməsinin 2007-ci il tarixli qərarı ilə "Laskoviy May" qrupunun mahnılarının hüquqlarının prodüser Andrey Razinə verilməsi ilə bağlı olub.
Oxu.Az xəbər verir ki, bu barədə TASS məlumat yayıb. Sənətçinin ailəsini təmsil edən vəkillərin sözlərinə görə, məhkəmənin çıxardığı qərar dərhal icraya yönəldilib.
Vəkil Oleq Sitnikov bildirib: "Məhkəmə apellyasiya şikayətində Razinin mövqeyindəki ziddiyyətlərlə bağlı göstərilən dəlilləri qəbul edib. Məhkəmə iddiamızı dəstəkləyərək bildirdi ki, bu işə iddia icraatı qaydasında baxılmalı idi".
Digər vəkil Asel Muxtarova-Kazarnovskaya əlavə edib ki, məhkəmə Razinin nümayəndəsinin müəllifliyi sübut etdiyi iddia olunan əlyazma notlarla bağlı arqumentlərini əsassız hesab edib.
Xatırladaq ki, 2025-ci il dekabrın 4-də Soçinin Xostinski Rayon Məhkəməsi Razinin yeni açılmış hallar əsasında müəllif hüquqları ilə bağlı işə yenidən baxılması tələbini araşdırıb.
