Şəkər əlavəli şirin spirtli içkilər quru şərab və şəkərsiz tünd alkoqoldan daha çox kalori ehtiva edir. Lakin diyetoloq Yelena Ustinova bildirir ki, ziyafətdən sonra çəki artımının əsas səbəbi alkoqol deyil, həddindən artıq yeməkdir.
Rusiyalı terapevt-diyetoloq Gazeta.ru-ya müsahibəsində qeyd edib ki, spirtli içkilərin əsas tərkib hissəsi etil spirtidir (etanol). Məsələn, 100 ml quru şərabda təxminən 11-12 q etanol var, qalanı sudur. Araq və ya konyak kimi tünd içkilərdə etanol miqdarı 40%-ə çatır.
Həkim spirtli içkiləri şirin və şəkərsiz olmaqla iki qrupa ayırır. Likörlər, meyvəli içkilər, tündləşdirilmiş şərablar və kokteyllər şirin kateqoriyaya aiddir. Bu içkilərin yüksək kalorili olması əlavə edilən şəkər və karbohidratlardan qaynaqlanır.
Ekspert deyir: "Etil spirti özlüyündə enerji dəyəri daşısa da, onun metabolizmi fərqlidir. Etanoldan alınan enerji piy kimi yığılmır, əsasən istilik istehsalına sərf olunur. Buna görə də spirt qəbulundan sonra çox adam isinmə hiss edir. Beləliklə, etil spirti piy kütləsinin artmasının birbaşa səbəbi deyil."
Bədən quruluşuna önəm verənlərə quru şərab və ya şəkərsiz tünd içkilər (araq, tekila, konyak) tövsiyə edilir. Bu içkilərdə şəkər miqdarı daha azdır.
Ustinova vurğulayır ki, ən vacib məqam alkoqolun iştahı artırmasıdır: "Bir neçə qədəhdən sonra özünənəzarət zəifləyir, insan planlaşdırdığından çox yemək yeyir. Həddindən artıq yeməyin ən geniş yayılmış səbəbi budur. Üstəlik, spirt adətən yağlı və ağır yeməklərlə müşayiət olunur. Nəticədə ertəsi gün maye tutulması səbəbindən şişkinlik və çəki artımı müşahidə edilir."
Yekun olaraq, mütəxəssis bildirib ki, iştahına nəzarət edən, şirin qəlyanaltısız içilən bir-iki qədəh quru şərabın bədənə ciddi təsir etmə ehtimalı azdır. Lakin bol spirtli və yüksək kalorili yeməklərlə keçən uzun ziyafətlər çəki artımına birbaşa şərait yaradır.
