ABŞ-nin Kaliforniya ştatında məhkəmə aktyor Metyu Perrinin şəxsi köməkçisi Kennet İvamasanı 3 il 5 ay müddətinə azadlıqdan məhrum edib.
Oxu.Az xəbər verir ki, məlumatı TASS yayıb.
İvamasa aktyorun ölümünə səbəb olan narkotik maddəni əldə etməkdə və həmin maddəni inyeksiya yolu ilə onun bədəninə yeritməkdə təqsirli bilinib.
ABŞ Ədliyyə Nazirliyi bildirib ki, 61 yaşlı İvamasa əlavə olaraq 10 min dollar məbləğində cərimə ödəməlidir.
İstintaq müəyyən edib ki, o, 2022-ci ildən Perrinin şəxsi köməkçisi olub və aktyora dəfələrlə ketamin inyeksiyası edib. 2023-cü ilin oktyabrında vurulan inyeksiyanın ölümcül olduğu qeyd olunur.
İvamasa 2024-cü ilin avqustunda ketaminin qanunsuz yayılması məqsədilə cinayət sövdələşməsində iştirak etdiyini etiraf edib.
Bu iş üzrə ən ağır cəza "Ketamin kraliçası" kimi tanınan Jasvin Sanqhaya verilib. O, narkotik maddənin qanunsuz təchizatına görə 15 il müddətinə azadlıqdan məhrum edilib.
Metyu Perri 2023-cü il oktyabrın 28-də Kaliforniyadakı evində ölü tapılıb. O, daha çox "Dostlar" serialındakı Çendler Binq rolu ilə tanınırdı.
