Bakı-Tbilisi qatarının yenidən fəaliyyətə başlaması regionda səyahət imkanlarını canlandırıb. Altı illik fasilədən sonra bərpa olunan bu marşrut həm alternativ nəqliyyat vasitəsi, həm də yeni turistik istiqamətlər təklif edir.
Turizmçi Əfsun Əhmədov bildirir ki, bu səfərlərə maraq yüksəkdir: "Artıq Bakı-Tbilisi qatarı ilə Gürcüstana səyahət etmək mümkündür. Turpaketlər hələ az olsa da, Qars üzərindən Türkiyənin Qara dəniz şəhərlərinə getmək asanlaşıb."
Qiymətlər 109-237 USD (185-403 AZN) arasında dəyişir. Turizmçi Günel Şıxıyeva bildirir ki, bir istiqamət üçün qiymət 81 AZN-dən başlayır. Ən populyar marşrut "Bakı-Tbilisi-Batumi-Trabzon-Uzungöl"dür.
Turizmçi Əziz Şiriyev qatarın turizmə və regionların inkişafına töhfə verəcəyini vurğulayır: "Bu addım ölkəyə turist axınını artıracaq, iqtisadi və mədəni əlaqələri gücləndirəcək."
