Lavanda çayı mizofoniya (eşidilən səslərdən qıcıqlanma) simptomlarını yüngülləşdirə bilər. Türk alimləri müntəzəm lavanda çayı içməyin bu pozuntunun psixoloji əlamətlərini azaltdığını müəyyən ediblər.
Mizofoniya adi məişət səslərinə qarşı güclü qıcıqlanma, narahatlıq və aqressiyaya səbəb olur. İki həftəlik tədqiqatda iştirakçılar gündə iki dəfə lavanda çayı içib və nəticədə narahatlıq, depressiya və qəzəb səviyyələrində əhəmiyyətli azalma müşahidə edilib. Araşdırma "Journal of Psychiatric Research" jurnalında dərc olunub.
Tədqiqatda 60 nəfər iştirak edib, onların əksəriyyəti 20 yaşlarında qadınlar olub. Könüllülər 14 gün ərzində səhər və axşam lavanda çayı içib, hər qurtumdan əvvəl içkinin ətrini dərindən nəfəs alıblar. Nəzarət qrupuna heç bir müdaxilə edilməyib.
Nəticələr göstərib ki, çay içən qrupda mizofoniya simptomları yaxşılaşıb, həyat keyfiyyəti artıb və qıcıqlandırıcı səslərlə mübarizə daha effektiv olub. Lakin lavanda çayı tam müalicə təmin etməyib və genişmiqyaslı tədqiqatlara ehtiyac var. Hazırda o, yalnız mövcud müalicəyə əlavə kimi nəzərdən keçirilə bilər.
