Alimlər yaşlılıq dövründə bəzi insanların zehni aydınlığını necə qoruduğunu müəyyən ediblər. Araşdırmaya görə, beyinciyin yaşla qeyri-bərabər dəyişməsi bu fərqi izah edə bilər.
Kəllənin arxa hissəsində yerləşən beyincik, ənənəvi olaraq hərəkət koordinasiyası ilə əlaqələndirilsə də, yeni tədqiqat onun təfəkkür və yaddaşda da mühüm rol oynadığını göstərir.
"Nature Neuroscience" jurnalında dərc olunan araşdırmada 700-dən çox amerikalının beyin görüntüləri təhlil edilib. Beyincik 11 sahəyə bölünərək yaşa bağlı həcm dəyişiklikləri qiymətləndirilib.
Nəticələr göstərib ki, mürəkkəb əqli funksiyalara cavabdeh olan arxa hissələr ön hissələrə nisbətən daha sürətlə kiçilir. Ahıl yaşlarda beyinciyi daha böyük olan şəxslər yaddaş və təfəkkür testlərində daha uğurlu olub.
Tədqiqatçılar beyinciyin "koqnitiv rezerv" rolunu oynaya biləcəyini vurğulayırlar. Lakin səbəb-nəticə əlaqəsi hələ tam aydın deyil.
