Böyük Britaniyalı paralimpiyaçı Con Makfol kosmosa uçmağa hazırlaşır. O, orbitdə yaşayacaq ilk fiziki məhdudiyyətli astronavt ola bilər.
"The Guardian"ın məlumatına görə, bir ayağı amputasiya olunmuş Makfol "Heyven-1" kosmik stansiyasına uçacaq. Bu missiya Britaniya Kosmik Agentliyinin ABŞ-nin "Vast" startapı ilə müqaviləsindən sonra reallaşacaq.
Paralimpiyaçı uçuşu heyrətamiz fürsət adlandırıb. O, iki həftə ərzində kosmik mühitin və çəkisizliyin protez daşıyan bədənə təsirini araşdıracaq. Tədqiqatda sensorlar və mikroprosessorlu müasir protezlərin kosmosdakı vəziyyəti də öyrəniləcək.
Bu missiya osteoporoz və əzələ kütləsi itkisi kimi xəstəliklərin daha yaxşı anlaşılmasına, həmçinin reabilitasiya proqramlarının inkişafına kömək edəcək.
