Saç tökülməsinin qarşısını almaq üçün gündəlik qida rasionuna ət və süzmə daxil edilməlidir.
Rusiyalı həkim-diyetoloq Anastasiya Samoylova "News.ru"ya müsahibəsində bildirib ki, bahalı şampunlar və serumlar almağa tələsməyin. Problem saça qulluq vasitələrindən daha dərindədir.
Saçlar zülal quruluşundadır. Menyuda ət, balıq, yumurta və ya süzmə azdırsa, orqanizmin saçları bərpa etmək üçün materialı olmayacaq. Rasiona zülal və faydalı yağ mənbələrini daxil edin. Yuxu rejimini unutmayın, çünki yuxusuzluq kortizol (stres hormonu) səviyyəsini artırır.
Saç insanın daxili vəziyyətinin güzgüsüdür. Aktiv saç tökülməsi zamanı ən geniş yayılmış səhv internetdən və ya tanışlardan məsləhət alaraq vitamin qəbuluna başlamaqdır. Bu kömək etməz, hətta vəziyyəti pisləşdirə bilər. Əvvəlcə səbəbi müəyyən edin.
Dəmir çatışmazlığı (anemiya) və hipotireoz saç tökülməsinin əsas səbəbləridir. Problem varsa, həkimə müraciət edin.
